Es isch scho lang här, sitt einisch dä Mäsi vo dä Gugguisälär a miär verzeut hed, vo iräm Fasnachtsgrippli. Won ich de diä Gugguisälär einisch in Aktion a dr Fasnacht gseh ha, isch fir mich klar gsi, so muessi ai einisch ä Fasnacht duräläbä. Dazumals hani natirlich no niä dänkt, dass da druis emau wärdid d Tröchner entstah ... aber eis nachem anderä.

Anno 1997 gägä Herbscht zuächä isch mier de mau widär sonä gedankä beziglich Fasnacht durä chopf gschossä, sozägä ä urknall. Vorsichtig hani de mau dä Roger aahghaiä, eb är de ai wurdi mitmachä bi sonere Wägilifasnacht und scho simmär s zweitä gsi. Fleissig hemmer is Gedankä iber dä Wagä gmacht: Wenn buiämär? Wie mechämers am gscheidschtä? Und so weitär ... A dr Fantasie heds uf jede Fau niä gmanglet, so isch emau die Idee dagsi, eiserein Wägili am Freitig nach em Schmudo uf Luzärä uisä z stossä und det weitär z fäschte ... jugendlichä ibermuät chammär da numä sägä!

Wommär de mau gwissd hend, was s Motto seu sei (Älpler) hemmer de nu dr Ronny und de Marc agfragt, ob sie ai derbii wärid bimäne sottige Fasnachtsgrippli. Prompt hend diä zwe zuägseid und so planig nomau voll losgange: material hed miässe bsorgt wärde und natirlich isch ai ä richtig musigaalag zuchegmiätet worde. S buiä hed sich de aus zimlich heimtückischi sach uisägstellt ... dä huere wagä isch eifach z schwär worde. Da isch eis de no de Joel z Hilf cho und de wärids de feif gsi.

Schlussändlich hed de doch nu aues klapped, so dass mer am Schmudo 1998 s'erscht mau als Grippli mitemene Wagä a dr Fasnacht gsi sind. Voller Begeischterig hemmer de chennä diä Fasnacht erfolgriich abschliässä.

Im Novämbär 1998 simmer de widär zämecho zum s 99gi z bespräche, aber ai um en offiziellä Verein z grindä, so richtig mit Statutä und auem drum und drannä. Gleichzeitig hemmer de ai nu grad es nius Mitglied uif gno: dr erscht Buochser, de Dani. So simmer de im Februar 1999 als offizielle Verein mit em Name Tröchner als Cowboys mit eiserem Saloon ufem Dorfplatz erschinä.

Sithär hedes eppä ä Zugang vomene niuä Mitglied gä und immer eppä widär e chli es greesers Wägili und so wärid d Tröchner a dr Fasnacht hit zu tags scho fascht nimmä vom Dorfplatz wäg z dänke.

Urtröchner Philipp