Wo eysereins z'Ohrä cho isch, as ai usswärts gherig gfasnächtläd wird (gmeind isch nateyrli richtigi Fasnacht, auso nid diä in Luzärä!) hemmer dänkt miär derfid ai det nid fähle. Auso sind am Freytig nachem Schmudo 01, nach eppe feyf Stund Schlaf nachem Schmudomarathon, äs paar Unverwiäschtlichi nach Gerlafinge im Kanton Solothurn uifbroche. Us verständlichä Gründ hed ä keinä wellä fahre und so simmer haut midem Zug gangä. Mid gnuäg Biär im Vorrat isch das äs rächt luschtigs Reisli wordä, ämu fir eys. Nacheme Chaifruisch bim umsteygä in Oltä heds de ai nu eppä chle klepft im Abteil innä. Wo miär de ändlich acho sind, simmer bi weytem di erschtä gsi wo si inägla hend zum Fäscht. Aber isch ja gleych, grad vou Gas hemmer gseid. Vor auem einä wo s'erscht mal im 01 a d'Fasnacht isch, willer vorhär Prüfigä gha hed, isch grad mal vou drigschossä. Är hed de speter eppä drey Stund Paisä gmacht i seym Eggili...

Ändlich hed sich de diä Hauä gfiud, und aui hend Freid gha, das mer fasch keini Strassäfasnachtler gseh hed. Voll in Stimmig isch diä Party losgangä. Diä Solothurner wissid auso gherig wiä fäschtä. Trotz chalte Hotdog und Asiatisch ohni Fleisch isch Ziit verbey wie neyd. Vor auem wo de nu zwe Meitili hend afa singä uf de Bühni hed vor auem Einä d'Zeyt vergässe. Dä muäs ai ä Rächnig gha fir seyni Fetili!! Und uberall s'Gleychä druffä!

Irgendwenn im Morgä innä hend de ai diä Solothurner gmeind äs sigi gnuäg. Auso simmer uisä und hend wieder miässe a Bahnhof uf Solothurn. Diä einte hend was gisch was hesch äs Taxi gnu und diä andere eifach la sta. Doch ai di andere hend gley einsch zwe Meitili uiftribä gha wo si uf Solothurn chauffiärd hend. S'Problem isch nur gsi, das feyf Leyt plus zwei Chauffeusä relativ schlächt inä Fiat Panda inägend. (Bonsai! Grind appä!!) Und wenn de d'Chauffeuse nu d'Handbräms azogä lahd, schmeckts de ai nu fein. Aber was sells. Miär sind ämu guäd a Bahnhof cho. Sogar dä Schmidli isch nid zschpat cho! De Rescht vo eysem Uisflug isch eigentlich schnell verzeud. Nachdem es paar scho in Hammer bi Olte s'zweufti Gleis gsuächt hend und nid druis cho sind wieso das es det nur zwei gha hed, sind de doch alli via Olte richtig heizuä gfahre. Nach Polonaise und Tulpäverrupfä simmer de in Luzärä acho. Di eintä sind de richtig Heimat, di andere heds de no chle is Städtli zoge am morge am achti.

Dä Uisflug isch richtig Legändä wordä bi eys und vor auem bi denä wo debiä gsi sind. Miär wärdid ai das Jahr wider uf Gerlafingä fahre. Vilich simmer de nimmä di einzigä Nidwaudnär in Gerlafingä.

Debiä gsi ufem legendärä erschtä Gerlafingäreisli:

Roger, Dani, Joël, Ronny, Philipp, Kili, Sigi, Maz, Grendel Flo