Nach dem fascht scho legendärä Fäscht im 2001 in Gerlafinge SO hemmers eys nateyrlich nid la näh, ai im 2002 wieder äs Uisfliigli zmachä. Ai heyr ischs wieder is Solothurnischä gangä, a di gleych Party, eifach amene andere Ort. Bibrist isch de Name vo de Legändä 2002.

Trotz Schmudomarathon hemmer doch acht Nasene zämebracht, wo sich zum Iitrinkä im Tällä troffä hend. Und grad mal zum Afang e Knaller. Telefon vom Joël: „Chumä nid, bi chrank!“ Und will miär heyr äxtra äs Bussli gmiätet gha hend fir eyses Reisli (das ai ja niämer z’spat chunnd das Jahr!) und genau de Joël hätt miässä/derfä/wellä fahrä, hemmer de churzerhand es grössers Problem gha. De Rescht hed nämlich nid wellä oder scho wieder nimmä chennä fahre. Auso midem Zug? „Nei z’teyr, ich ha käs Halbtax!!“ „Schiisst mi a midem Zug! Ich gah im Fall a Mattli-Ball mid de Zulus!!“ Chlineri Diskussionä, vo moderat bis sehr hitzig. Genau zu derä Ziit chunnd s’zweitä Telefon vom Joël: „Scheissdrauf! Chumä gleych!“ „Häää, Kili, ha di wenig verarscht! Chumä dänk au uf Solothurn!!“ Schlussändlich stiigt de d’Stimmig schlagartig wieder und miär möchid eys ufä Wäg. No schnell es paar Biär über d’Gass und los gahds. Doch scho wieder e Knaller. De Joël muäs natürlich no chli imene Hundsdräck umästah, bevor är s’Bussli gahd go holä. Und natürlich striichtmers de au no grad im ganze Bus umä. Auso heds de nid nur vo üsne Fahne gschmöckt sondern mer hed de während de Reis au no ganz anderi Duftnotene wahrgno.

Gley nachem Start heds Biär de afa drücke und ä Zwüschehalt a de Raschtstätt in Gunzge isch da grad gläge cho. Einä hed anscheynend so dringend miässe uisä, das är grad de Türhebel vo de Schiäbetürä abgrissä heig. Vom Biär erliächteret hed de ä göttliche Chaufruusch agfangä. Under de kritische Auge vomene ganze Restaurant hemmer üs de mid allem iideckt womer nid brucht hend. Äs heig sogar einä ä neui Sunnäbrüllä kauft. De Priis wemmer etz da nid nennä. Und gli hend au alli gmerkt, das Loch imene Schoppänuggi haut scho huärä chley isch. Mid de Muisig vom neuä „Ballermannsaufhits“ Kassettli im Hindergrund isch de d’Reis weytergangä.

Churzi Ziit später simmer de in Bibrist iitroffä und hend üs i’d Party gstürzt. De DJ im obere Stock hed doch öppe drü verschiedeni CD’s gha zum ablah. Äs siigem de glaub au es paar Mal gseid worde...D’Liveband das Jahr isch nid ganz a diä vo letscht Jahr änächo. Sind au alles Manne gsi. De hed ämu einä chli chönnä spare bim Fötele...

So ischs de wiiter gangä bis eppä am drey am morgä einä hed afa alli vo üs zämetrummlä und’s gheissä hed: „Los, miär gend nu a Mattli-Ball!!“ Äs isch de aber doch nimmä so weyt cho. S’isch de haut no chle länger gange in Bibrist. Nachdem miär eys alli mid es paar Hotdogs und Saaldekoration iideckt gha hend, hemmer üs de ufe heiwäg gmacht. Ufem Heiwäg heds de rächt gruigäd. Bimene Zwischehalt in Neuenkirch hed de aber doch der eint oder ander gmeind, miär ‚sigi’d ersch churz nach Bärn. Aber so lang ischs de doch nimmä gangä. Chuim drheimä, ab i d’Fädere, das mer ai ja wieder fit sind fir dä Chriesiball am Abig.

Aber das isch e anderi gschicht...

Debiä gsi ufem Bibrist-Reisli: Roger, Dani, Ronny, Pippo, Joël, Sigi, Kili, Grendel Flo

Es Danke nu vo allne am Ronny und Joël für s’Uisäbutzä vom Bussli.